huban

眉妝出事現場大盤點

Vivian

Jun 17, 2017

化咗咁多年妝,好認同一句好基本嘅說話:睇人一定係睇對眼先。可能係職業病問題,每次一望人對眼,好自然就變咗唔係望眼神,而係佢對眼化得靚唔靚。好多人會問,其實點先叫化得靚。講真,化得靚嘅眼妝唔會指得出邊度邊度做得好;而係完全無出事,成功造就一個和諧自然嘅眼妝。

至於最易出事係咩地方?眼線?睫毛?只focus喺眼周咪出事囉。最易出事嘅,其實係條眉!

先唔講條眉化成點,條眉無修開真係點化都唔會好睇。眉型又無晒,上上下下又多雜毛,勁啲嘅仲會變咗一字眉!

Myreco


除咗修眉之外,化妝之前都唔該梳吓條眉,話晒化妝前除咗保養防曬,仲有base同碎粉等等,條眉點都有機會亂咗。就咁開始化眉妝,咁樣想條眉化出嚟順都好難啦。

跟住就到落手化眉妝。一個完美嘅眉妝,首先係要襯返眼形同面形,同埋想化出嚟嘅感覺。有人適合艷麗啲、戰鬥格啲嘅上掦眉妝,有人適合親和力高嘅平眉。有時候覺得人哋條眉怪怪的,但又唔可以話係重手咗定係輕手咗,其實就係因為眉妝唔襯整體妝容,又或者最基本、同髮色或者膚色唔襯,而產生嘅不協調感。

SAZ


要解決呢個方法好容易,化眉妝之前先好好諗吓,究竟呢隻眉筆、眉粉或者染眉膏,究竟襯唔襯你本身嘅底色?另外就係今日嘅造型究竟係咩路線?諗清楚晒先落手,犯錯嘅機會就會大大降低。