保濕噴霧點解越噴越乾?

Noel Yu

Sep 20, 2017

好多OL都會放一支保濕噴霧喺化妝袋或者公司檯面,覺得皮膚乾繃繃時就會拎出來噴一噴,但唔知妳覺唔覺,好多時噴完一陣,皮膚反而會更乾?到底點解呢?

原因好簡單,因為大部份保濕噴霧都是純礦物質水,只能夠補水而沒有鎖水功效,如果無做好後續護理,水份就會慢慢蒸發,令妳皮膚乾上加乾。要真正地保濕,就要做好兩個步驟:首先用保濕噴霧為角質層補充水份,之後輕輕用紙巾印乾或者用手拍乾水份,記得要塗上乳液或面霜,就可以鎖住肌層水份。

保濕噴霧除咗可為肌膚保充水份,其實仲有其他不同用途,例如係補妝前輕噴一下,再用紙巾吸吸臉上的油脂、塵埃及已融掉的粉底,稍作清潔後才補妝,妝容就會清透乾淨。另外,當我們午餐或外出工作後,臉蛋被太陽曬得紅紅熱熱時, 保濕噴霧可以有效幫助肌膚降溫,令肌膚保持清爽狀態。

此外,當妳被工作壓得透不過氣來,情緒快要大崩潰的時候,或是悶出個鳥來快要睡著了,就可以用保濕噴霧噴一噴,就好像用冷水洗臉般可讓妳冷靜下來,減輕緊張情緒 ,兼且有提神作用呢﹗