小心!營養補充品背後的陷阱

Noel Yu

Dec 19, 2017

近年都市人越來越注重健康,成日覺得自己營養不足,但好多時飲食又唔夠均衡,因此好多人會選擇營養補充品,例如維生素、礦物質、氨基酸補充劑以及草本食品等,呢款話可以提升抵抗力,嗰款又話有效改善皮膚同頭髮問題,食一粒小九子就可以更健康美麗,方便又簡單,何樂而不為?

其實,營養補充品絕對唔係「有病醫病、無病補身」咁簡單,因為每粒補充品都是濃縮劑量,一唔小心好易攝取過量,有損害健康的風險。根據2016年《新英格蘭醫學雜誌》一項研究指出,於2004至2013年期間,美國每年有超過2萬人因不當攝取營養補充品而令身體產生不良反應,需要到急診室求診。

到底為何營養補充品多食會無益兼有害呢?以維生素C為例,市面上的補充片份量平均介乎500至1000毫克之間,而成人每日的維生素C建議攝取量不低於45毫克即可,即一片補充片已是每日建議攝取量的10至20倍。雖然多餘的維生素C可透過汗水或尿液排出體外,不過就會產生代謝物——草酸,長期服用會增加高草酸血症的風險,有機會引致腎結石的。

咁假如從日常飲食中攝取營養,又會唔會好易超標?再以維生素C為例,一個中型橙約有75毫克,即每日要食7至8個橙先抵得上一片維生素C補充份量,妳會唔會咁瘋狂先?

其實,醫學界認為均衡飲食就足以提供身體所需的營養,因此毋須額外服用補品,即使是素食者也可以通過其他不同食物攝取足夠的營養,如不飲用牛奶者,可以用豆類或豆類製品替補,至於孕婦或其他特殊情況的人士,就可向醫生查詢有冇需要食營養補充品。